گونئی آذربایجان جۆمهورییت پارتیسؽ بیر داها میللی دؤلتچیلیک پرینسیپلرینه، سیاسی مۆستقیللیغه و آذربایجان میلتینین اؤز مۆقددراتینی تعیین ائتمک(حق تعیین سرنوشت) کیمی عوضسیز حۆقوقونا سؤیکنَرک، آذربایجان جۆمهورییتینده میللی سۇوئرئنلیگی، حۆقوق سیستئمینی و سئکۇلیاریزم پرنسیبینی قطعیتله دستَکلدیغینی بَیان ائدیر.
آذربایجان جۆمهورییتی آراز چایؽنین شیمالؽنداکی میلتیمیزین تاریخی و سیاسی ایراده‌سینین بهره‌سی، میللی دؤلتچیلیغیین و ایقتیدارؽن تجسۆمودور.
هئچ بیر خاریجی قۆوه، ایدئوْلوژی جرَیان و یا دینی-مذهبی شبکه داخیلی مسئله‌لردن سۇ-ایستیفاده ائده‌رک ، بۇ اؤلکه‌نین مۆستقیللیغینه و ثابیتلیغیینه خلل گتیرمک حۆقوقونا مالیک دئییلدیر.
آذربایجان میلتی اؤز تاریخی بوْیونجا یاخؽن شرق و ایسلام دۆنیاسی خالقلارؽ آراسؽندا هر زامان سئکۇلیاریزم و لایسیزمین(دین و سیاستین آیریلیغی )اؤنجوسو اوْلموش، اوْنون سیاسی مدنیتی دؤزوملولوک، هر جۆر دینی آیرؽ-سئچکیلی‌یین ردد ائدیلمه‌سی و دینین دؤلت اداره‌چیلیغییندن تام آیرؽلماسی تمه‌لی اۆزرینده قۇرولموشدور.
آذربایجان دؤلتینین و اهالیسینین لایک اوْلماسی دینی ایستیبدادؽن قارشؽسیندا کئچیلمز بیر سد، وطنداشلارؽن دینج بیرگه یاشایؽشینین ضمانتی، فردی آزادلؽقلارین قوْرونماسی و جمعیتین مۆعاصیر ترقّیسی اۆچون حیاتی بیر داماردؽر. آذربایجان دؤلتی تۆرک و ایسلام دۆنیاسیندا بۇ دَیرلی ایرسین هر زامان لایقینجه کئشی‌یینده دۇرموشدور و دۇراجاقدیر.
ایللردیر ایران دؤلتینین ایشغالؽ،مۆستملکچیلیغیی, دینی و ایدئوْلوژی ایستیثمارؽ قارشؽسیندا میللی و سوْسیال آزادلؽغیمیز اۇغروندا مۆباریزه آپاران گۆنئی آذربایجان تۆرکلری اوْلاراق اینانؽریق کی، اینسانلارؽن اینانجؽ و حیجاب مسئله‌سی ژئوْپولیتیک رقابتلرین و مۆستقیل دؤلتلره تعضییق گؤسترمه‌یین واسیطه‌سینه چئوریلممه‌لیدیر.
تاریخی تجرۆبه گؤسترمیشدیر کی، ایران کیمی دینچی گوجلرین بؤلگه‌دکی سرحداۆستو تبلیغاتؽ،دین اؤرتویو آلتیندا یۇمشاق گۆج نۆفوذو و وکیل شبکه‌لرینین فعالیتی ایله ، اؤلکه‌لرین میللی سۇوئرئنلیغینی ضعیفلتمک اۆچون داغؽدیجی بیر واسیطه‌دیر. ایران رئژیمی کیمی دینچی سیاسی گوجلر ایللردیر سوْسیال تخریباتلارلا، تحصیل مۆحیطینی سیاسیلشدیرمکله و مکتبلری دینی مۆناقیشه میدانؽنا چئویرمکله بیرباشا آذربایجانؽن میللی گۆونلیغینی و دؤلتچیلیغیینی هدف آلمؽشدیر.
بیز وۇرغولاییریق کی، هر نوْع خاریجی مۆداخیله، دینی تشکیلاتلارؽن گیزلی مالیه لشدیریلمسی و وکیل گۆجلئرینین مۆتشکیل فعالیتی اؤلکه‌نین مۆستقیللیغیینه بیرباشا تهدیددیر و حۆقوقی، ائله‌جه‌ده تهلۆکه‌سیزلیک اوْرگانلاری طرفیندن قطعیتله ضررسیزلشدیریلمه‌لیدیر.
سیاسی سرحدیمیز و میللی کیملیغییمیز آیدؽندیر:آذربایجان دؤلتی دۆنیاداکی بۆتون آذربایجان تۆرکلرینین میللی آرخاسؽ و دولتیدیر. وطنداشلارؽن اینانجؽنا حؤرمتله یاناشماقلا یاناشؽ، خاریجی مۆداخیله‌لره قارشؽ سارسؽلماز دۇروش گؤسترمک و دؤلتی قوْروماق آرازؽن گۆنئیینده و قۇزئیینده یاشایان هر بیر وطن سئور آذربایجانلؽنین میللی بوْرجودور.
گونئی آذربایجان جۆمهورییت پارتیاسؽ (آ.ج.پ)، آذربایجان جۆمهورییتی دؤلتینین سۇوئرئنلیگی برقرار ائتمک، سئکۇلیاریزم و گئییم قایدالارؽ ایله باغلؽ قانۇنلاری ایجرا ائتمک کیمی قانۇنی حۆقوقونو دسته‌کلمکله یاناشؽ، شفافلؽغین، عدالتین و بۇ توْرپاغین اؤلادلارینین تحصیل حۆقوقونون قوْرونماسینین واجیبلیغینی وۇرغولاییر.
دؤلتین دایانؽقلی ایقتیدارؽ قانۇنون عالیلی‌یینین اجتماعی اعتیمادلا قوْووشماسیندا یاتؽر. بۆتوو میلتیمیزین میللی ایراده‌سی هر زامان یایؽمجیلیغین، ایرانچؽلیغین و سیاسی ایسلام ایدئوْلوژیسینین قارشؽسیندا ائن بؤیوک مانع اوْلموشدور و بۇندان سوْنرا دا اوْلاجاقدیر.
یاشاسین آذربایجانؽن مۆستقیللیغیی!
وار اوْلسون میللی، سئکۇلیار و لایک دؤلتچیلیک!
گونئی آذربایجان جۆمهورییت پارتیاسؽ (آجپ)
