اۇجا آذربایجان تۆرک میلّتی!
اسارتی رد ائدن ایگید گونئی آذربایجان گنجلیغی
! ۱خورداد سادهجه تقویمده قئید اوْلۇنان بیر تاریخ دئییل؛ او، سۇسدۇرۇلماق ایستهنیلن بیر میلّتین میلّی دیرچلیش مانیفستی، فارس شۆوینیزمینین سؤمۆرۆجۆ دیوارلارینی تیترهدن میلّی غۆرۇر آلوْوۇمۇزدۇر. بۇ شانلی گۆن ایرانچیلیق مفکورهسینین گونئی آذربایجاندا هم سیاسی، هم ده معنوی جهتیدن یئرله-یئکسان ائدیلدیگی و بۇتوْو بیر میلّتین “بیز واریق و وار اولاجاغیق!” دئیهرک تاریخی هایقیریشینی دۆنیایا اعلان ائدیب دؤنۆش نۆقطه سیدیر.
ایگیرمی ایل اؤنجه تبریزدن اۇرۇمویا، اردبیلدن زنجانا، سۇلدۇزدان خوْیا و تهرانا قدر میدانلاری لرزهیه گتیرن میلیونلار یالنیز عرقچی بیر مطبۇعات تحقیرینه قارشی یۆرۆمۆردۆ؛ میلّتیمیز اوْنایللرله داوام ائدن آسیمیلاسییون ، اریتمه، فارسلاشدیرما، ایقتیصادی تالان، میلّی کیملیگین اینکاری و سیستملي مۆستملکهچیلیک سیاستینه قارشی اؤز قطعی حؤکمۆنۆ وئریردی. اوْ گۆن میدانلاردا یۆکسلن “هارای، هارای، من تۆرکم!”، “آذربایجان یاتماییب، اؤز دیلینی آتماییب!”, “آزربایجان یاشاسین”و “آذربایجان وار اولسون، ایستمهین کوْر اوْلسۇن!” کیمی هارایلار عادی شۆعارلار دئییل، بیر میلّتین وارلیق آندی ایدی.
مۆستملکهچی و ائیرقچی ایران رژیمی هر زمان اوْلدۇغو کیمی دیهنک، گۆلله، ایشگنه و زیندان واسیطهسیله بۇ ایرادهنی قیراماجاغینی ظن ائدرکن، خارجده یۇوا سالمیش فارس مرکزلی سؤزده “مۆخالیفت” ده اؤز شۆوینیست طبیعتینه سادیق قالاراق رژیم ایله عینی جبههده بیرلشدی، میلّتیمیزه قارشی روانی( پسیکوْلوْژي) ترور و تهدید کامپانییاسی باشلاتدی.بۇ آمانسیز باسقیلار قارشیسیندا شهیدلر وئردیک، گنجلریمیز زیندانلاردا آغیر ایشگنجهلره معروض قالدی، سوْیداشلاریمیز دیدرگین دۆشدۆ، آنالار گؤز یاشی تؤکدۆ؛ لاکین نه رژیم، نه ده پانایرانیست دایرهلر آذربایجان تۆرکۆنۆن میلّی آزادلیق رۇحۇنو زنجیرلهمگین قئیری-مۆمکۆن اوْلدۇغو حقیقتینی حسابلایا بیلمهدیلر.
بۇ گۆن اوْ شانلی قیامین اۆزریندن ۲۰ ایل کئچمهسینه باخمایاراق، هاوایا قالدیریلان میلّی یۇمروقلار و بوْزقۇرد نیشانهلری عینی قطعیّتله میدانلاردادیر و اوْ گۆن آلیشدیریلان مشعل آزادلیق، عدالت و میلّی حؤکومت یوْلۇمۇزۇ داها گۇر شکلده ایشیقلاندیریر.بۇ گۆن گونئی آذربایجاندا قوْرخۇ سدلرینی آشمیش، فارسلاشدیرمانی کؤکوندن رد ائدن، پانفارسلارین و پانایرانیستلرین جانینا ولوله سالان، ایرانچیلیغی هر هانسی بیر آد آلتیندا اۆلۇرسۇن-اوْلسۇن افشا ائدیب گئری پۆسکۆردن یئنی، شۆعۇرلۇ و اینتیظاملی بیر تۆرک نسلی وار.
بۇ نسل آرتیق دیز چؤکمک و یا آسیمیلاسییون اوْلۇنماق اۆچۆن دئییل، موْدرن گونئی آذربایجان میلّی دؤولتینی قۇرماق اۆچۆن یئتیشیر.بیز بۇتۆن دۆنیایا و بولگه دولتلری گۆجلره آچیق شکلده بیان ائدیریک کی، گونئی آذربایجاندا آذربایجان تۆرک میلّتی باشقاسینین توْرپاغیندا گؤزۆ اوْلمایان، لاکین اؤز تاریخی وطنینده اؤز دیلی، اؤز بایراغی و اؤز سۇوئرن ایرادهسی ایله یاشاماق عزمینده اوْلان بیر خالقدیر.بۇ بینالخلق حۆقۇقۇن تانیدیغی ان تمل میلّی حقّیمیزدیر؛ چۆنکی بیر میلّتین دیلینی یاساقلاماق، تاریخینی ساختالاشدیرماق، کیملیگینی تحقیر ائتمک و سروتلرینی تالاماق قوْرخۇ ایچینده اوْلان و چؤکمهیه محکۇم ایمپئرییالارین تطبیق ائتدیگی بشرّیته قارشی جینایتدیر.
آذربایجان تۆرکۆ اسارته و ایرانچیلیق ایدئوْلوْژییاسی ایله اصلا باریشمایاجاق، بۇ مۆقدس میلّی مۆباریزهنی احساسات ایله دئییل، داغینیقلیغی رد ائدهرک استراتئژی عاغیل، میلّی تشکیلاتلانما و سارسیلماز بیرلیک قالخانی ایله ظفره داشییاجاقدیر.
بۇ مسئولیتلی تاریخی مرحلده هر بیر سوْیداشیمیز درک ائتمهلیدیر کی میلّی حرکتیمیز شخصی شؤهرت و ائقوْ پلاتفوْرماسی اوْلمادیغی کیمی، گونئی آذربایجان داواسی دا قروپلاشما، طیفلر و فراکسیونلار ساواشلارینا آلت ائدیله بیلمز.بیزیم سیاسی مۆباریزمین و تاکتیکیمیز دۆشمنله گیزلی و پردهآرخاسی سؤودهلشمهلر آپارماق دئییل، کئچمیشین یانلیشلارینی تکرارلامادان میلّی ماراقلارین مۆطلق مۆدافیعهسی اۆزرینده میلّی دؤولتچیلیغیمیزی اینشا ائتمکدیر.بۇ قارشیسیالینماز میلّی ایرادهنی آرتیق هئچ بیر بینالخلق گۆج گؤرمزدن گله بیلمز؛ چۆنکی بیر جوْغرافییادا اینسان حاقلاری سیستملي شکلده تاپدانیرسا، بۇ پروْبلئم آرتیق “داخیلی مسئله” دئییل، گلوْبال بیر اینسانلیق داواسیدیر.
بینالخلق حۆقۇقۇن اَن عالی پرینسیپلریندن بیری اوْلان “میلّتلرین اؤز مۆقدراتینی تعیین ائتمه حقّی”، سۆنی شکلده آیاقدا ساخلانیلان توْتالیتر دؤولتلرین “اراضی بۇتؤولۆگۆ” بهانهسیندن داها اۆستۆن و داها لئگیتیملي و مشروع بیر حقدیر:/
آزادلیق ایستیینی “ایرانین اراضی بۇتؤولۆگۆ” و یا “بولگه ده سابیتلیک” آدی آلتیندا بوْغماغا چالیشماق سیاسی رییاکارلیق و ایکیلی ایستاندارد اوْلدۇغو کیمی، بۇ حرکتی مۆختلیف ایرانچیلیق لاییحهلری و “مرکزچی” اویۇنلار ایچینده اریتمهیه چالیشماق دا ۳۰ میلیونلۇق آذربایجان تۆرکۆنۆن ایرادهسینه قارشی آچیق خیانتدیر.بۇ گۆن ۲۲ مای کیمی قیاملار یالنیز کئچمیشین خاطیرهسی دئییل، گلهجک میلّی حؤکۇمتیمیزین تمل داشلاریدیر و بیز اوْ مۆقدس یوْلۇن دؤنمز یوْلچۇلاریییق. نه زیندانلار، نه ایشگنجهلر، نه رژیمین ترور ماشینی، نه تهدیدلر و نه ده اؤلۆم بیزی یوْلۇمۇزدان دؤندره بیلمهیهجک
؛ آرتیق گئری دؤنۆشۆ اوْلمایا بیر حقیقەت وار: گونئی آذربایجان اویانمیش و آیاغا قالخمیشدیر؛ اؤز میلّلی حؤکۇمتیندن، دؤولتچیلیغیندن و اراضی بۇتؤولۆگۆندن هئچ بیر آد آلتیندا اصلا گۆذشته گئتمهیهجکدیر!
یاشاسین آذربایجان تۆرک میلّتی!
یاشاسین گونئی آذربایجانین میلّی حرکتی!گونئی آذربایجان جۆمهۇریت پارتییاسی
خورداد آینین بیری ۱۴۰۴–
