گونئی آذربایجان جومهورییت پارتییاسی، ایران حاکیمییتینه باغلی مدیا اورقانلارینین سی اِن اِن -ین هئچ بیر دقیق ثبوتا اساسلانمایان، یالنیز آدسیز و آنونیم قایناقلارا ایستیناد ائدن خبرینی بهانه گتیرهرک آذربایجان جومهورییتینه قارشی باشلاتدیغی علاقهلندیریلمیش تبلیغات و تخریبات کامپانیاسینی نؤوبتی اوغورسوز سیاسی و تهلوکهسیزلیک شوو تاماشاسی حساب ائدیر
.
سی اِن اِن -ین آدسیز و آنونیم قایناقلارا اساسلانان و آذربایجان جومهورییتینین رسمی تکذیبینه باخمایاراق یاییملانان خبری اطرافیندا یارادیلان کامپانیا گؤستریر کی، ایران حاکیمییتی اؤز سیاسی آماجلاری نامینه تصدیقلهنمهمیش معلوماتلاردان بئله ایستیفاده ائتمکدن چکینمیر. رسمی باکینین مؤوقعی آچیق شکیلده بیان اولونسا دا، ایران مدیاسی و اونا باغلی دایرهلر همین ایددیالاری گرچک کیمی تقدیم ائدهرک یئنی گرگینلیک یاراتماغا چالیشیرلار.
اوتوز ایل عرضینده ایشغالچی ائرمنیستانی سیاسی، ایقتصادی و موختلیف سویهلرده دستکلهین، آذربایجانین موستقیللیگینه و اراضی بوتؤولویونه قارشی دوشمنچیلیک مؤوقعی سرگیلهین، اؤلکهمیزده تررور و نارکوتیک شبکهلرینین فورمالاشدیریلماسینا شرایط یارادان، «سحر تیوی» کیمی کاناللار ایله آذربایجانا پیسخولوژیک ساواش آچان، عئینی زاماندا آذربایجان تورکونون میللی کیملیگینه و وارلیغینا قارشی سیستئملی کیملیکسیزلهشدیرمه و اریتمه سیاستی یورودن بیر رئژیم، بو گون بؤلگهسل سیاستده اوزلشدیگی چوخسایلی اوغورسوزلوقلارین و درینلشن داخیلی بؤحرانلارین تأثیری آلتیندادیر.
بو گون یئنیدن گوندمه گتیریلن کؤهنه و اساسسیز ایتیهاملار گؤستریر کی، آذربایجان جومهورییتینه قارشی آپاریلان تخریبات کامپانیاسینین اساس سببی ایسرائیل–آذربایجان موناسیبتلری و یا بؤلگهسل امکداشلیق دئییل. عکسینه، بو سیاسیتین کؤکونده ایران رئژیمینین گونئی آذربایجاندا گوجلنن میللی آزادلیق حرکتیندان و فورمالاشان سیاسی ایرادهدن دویدوغو ناراحاتلیق دایانیر.
رئژیم، گونئی آذربایجانداکی میللی حرکاتین آرتیق داها گئنیش ایجتیماعی و بؤلگهسل موستویده تأثیر گوجو قازاندیغینی گؤرور. ایران حاکیمییتی و عئینی پانایراننیست دوشونجهنی بؤلوشن دایرهلر قوزئی آذربایجانین گوجلنمهسینین گونئی آذربایجانداکی میللی پروسئسلره وئردیی تأثیردن جیددی ناراحاتلیق کئچیریرلر. محض بونا گؤره آذربایجان جومهورییتینه قارشی آپاریلان قارالاما کامپانیالاری اصلاً گونئی آذربایجانداکی میللی حرکاتا قارشی باسقیلاری آرتیرماق، میللی فعاللارا قارشی یئنی ایتیهاملار ایرهلی سورمک و محدودلاشدیریجی تدبیرلر اوچون زمین یاراتماق مقصدی داشیییر.عئینی زاماندا ایران، چوروموشلوک و درین بؤحران ایچینده اولان دؤولت سیستئمینی گیزلتمک، اؤلکهنین ایقتصادی، سوسیال و سیاسی پروبلئملرینی اؤرت-باسدیر ائتمک، اؤلکه داخیلینده آرتان ناراضیلیغی یؤنلندیرمک و ایجتیماعی دیققتلر گرچک پروبلئملردن یاییندیرماق اوچون خاریجی دوشمن نقشی و هدفی فورمالاشدیرماغا چالیشیر.
آذربایجان جومهورییتینه قارشی آپاریلان تبلیغات دا بو سیاسیتین آیریلماز حیسسهسیدیر.سئپاه (SEPAH) و اونا باغلی دایرهلرین آذربایجان–ایسرائیل امکداشلیغی ایله باغلی سسلندیردییی ایددیالار ایرانین بؤلگهسل سیاستده یاشادیغی اوغورسوزلوقلاری، سون ساواشدا (ایران-آمریکا و ایسرائیل) آلدیغی آغیر مغلوبیتلری، جئو-سیاسی مؤوقئهلرینین ضعیفلهمهسینی و خاریجی سیاستده اوزلشدییی گئریلمهلری گیزلتمک مقصدی داشیییر. بو یاناشما داخیلدکی طرفدارلاری سفربئر ائتمک و ایجتیماعییتین دیققتینی اؤلکهنین گرچک پروبلئملریندن یاییندیرماق اوچون ایستیفاده اولونور.آذربایجان جومهورییتینه قارشی سرد سؤیلم ایرانین تهلوکهسیزلیک ناراحاتلیقلاریندان دئییل، ۴۴ گونلوک وطن موحاریبهسیندن سونرا بؤلگهده فورمالاشان یئنی سیاسی واقعیتلردن و قافقازدا ایتیریلمیش تأثیر ایمکانلاریندان قایناقلانیر. آذربایجان–ایسرائیل موناسیبتلری ایسه بو کامپانییادا یالنیز بهانه رولونو اویناییر.
گونئی آذربایجان جومهورییت پارتییاسی بیان ائدیر کی، قورخو، نیفرت و دوشمنچیلیک اوزرینده قورولموش بو سیاسیت آرتیق تاریخی ایفلاسا اوغراییب. گونئی آذربایجاندا گوجلنن میللی سیاسی ایراده و ایجتیماعی اویانیش هئچ بیر تبلیغات و باسقی مئخانیزمی ایله دایاندیریلا بیلمز.بو گون تهرانین شووینیست رئژیمینی ناراحات ائدن اساس مسئله موستقیل آذربایجان جومهورییتی دئییل، گونئی آذربایجاندا فورمالاشان میللی سیاسی شوور، خالقیمیزین اؤز طالعینی معین ائتمک ایرادهسی و میللی یوکسلیش پروسئسیدیر.
آذربایجان جومهورییتینه قارشی آپاریلان کامپانیالار دا محض بو یوکسلیشی ضعیفلهتمهیه یؤنلمیش داها گئنیش سیاسیتین ترکیب حیسسهسیدیر. بؤلگهنین گلهجهیی پانفارسیست و پانایراننیست دایرهلرین پلانلاری ایله دئییل، ایراندا اسارت آلتیندا یاشایان میللتلرین آزاد ایرادهسی و اؤز موقددراتینی تعیین ائتمک حوقوقو اساسیندا فورمالاشاجاق.گونئی آذربایجانداکی میللی آزادلیق ایستهیی هئچ بیر تبلیغات، تضییق و یا سیاسی باسقی ایله دایاندیریلا بیلمز.
بو، آرتیق گئری دؤنوشو اولمایان تاریخی-سیاسی پروسئسدیر. گونئی آذربایجان خالقینین طالعی تهرانین تهلوکهسیزلیک قوروملارینین پلانلاری ایله دئییل، خالقین اؤز ایرادهسی ایله معین اولوناجاق. بیز آزادلیق، عدالت، دئموکراسی و میللی دؤولتچیلیک اولکولری اوغروندا موباریزهمیزی قطعیتله داوام ائتدیرهجیک.
گونئی آذربایجان جومهورییت پارتییاسی**۱۰-۰۶-۲۰۲۶
